U kan op een van die volgende maniere by ons gebedsbediening betrokke raak:
- Voorbidding voor Formele Oggenderedienste in die Kompleks en Kerk.
- Skakel in by die groep wat voorbidding doen by skole, hospitale en die polisie.
- Neem deel aan die 24/7 gebedsaksie twee keer per jaar.
- Word deel van ons Gebedsbediening om te help met praktiese organisasie.
Kontakpersoon: Hester van den Berg 042 293 3077 / 083 356 4565
GEBEDSKALENDER:
Verskyn maandeliks in Die Seebries – Februarie – Junie, Augustus – Desember.
GEBED EN VAS GEDURENDE DIE WEEK VAN GEBED – SOOS OP AFKONDIGINGS EN ALMANAK AANGEDUI.
U word uitgenooi om deel te neem aan vas saam met gebed gedurende die week van gebed. Om te vas is nie ’n prestasie wat ’n mens beter maak as die wat nie die vas benut nie, maar ’n manier om te fokus en meer konsentrasie te verky. Dit bespaar ook tyd wat voorbereiding van kos betref. Dit vereenvoudig ’n mens se lewe op ’n bepaalde manier. Dit gaan nie daaroor om enigiets te bewys nie. Dit gaan oor God.
RIGLYNE
Voorstelle oor maniere van vas:
1. Eet ontbyt en vas dan vir die res van die dag, tot na die gebedstyd in die week van gebed. Geniet daarna die ete.
2. Alternatiewelik: Eet net vrugte, groente en neute, en drink net water. (Nie te veel vars vrugte in die oggend nie, die suikerinhoud kan te hoog wees. Dit beteken dus dat ‘n mens alle vleisprodukte en suiwelprodukte uitsny, ook sop wat vleis in het en natuurlik vervang ‘n mens dit nie deur kitskos te koop nie. Jou liggaam het nodig om in ‘n posisie te kom waar jy verhoogde konsentrasie verkry om in gebed op God en Sy Koninkryk te fokus. Dit gaan nie oor die aktiwiteit self nie, maar oor wat God daarmee wil bereik. Hoe streng jy by die riglyne hou is jou eie keuse, solank dit help om jou konsentrasie en fokus te verhoog. Gebed en vas is altyd ook verootmoediging voor God. Ons is absoluut afhanklik van God, daarom het Paulus ook gesê dat ons altyddeur moet bid. )
3. Laat TV en baie besigwees, en baie werk om kos te maak in hierdie tyd en gebruik die tyd om geestelik te fokus. Laat ook enigiets wat jou aandag kan aftrek en waarmee jy jou andersins sou moes besig hou. Dit moet tot jou eie geestelike voordeel strek sodat God met jou kan besig wees.
4. Dit het groot waarde om neer te skryf wat jy by God hoor. As ‘n mens dit vergeet het, is dit weg. Vra vir die Heilige Gees om jou spesifiek te lei oor waarop jy jou aandag moet fokus.
BELANGRIK: – Enigiemand wat enige gesondheidsrisiko kan loop, is nie veronderstel om te vas nie.
GESINDHEID WAARMEE ONS VAS:
Ons fokus om die Here se wil te soek en Sy teenwoordigheid te beleef.
Ons loop dus nie daarmee te koop asof dit ‘n besondere prestasie is nie.
Ons gebruik nie gebed om God se arm te draai of mense te beïndruk nie.
Dit is absoluut vrywillig, so niemand verkwalik iemand wat dit nie wil doen nie.
Selfs al sou iemand dit net gedeeltelik doen op enige manier, maak dit nie saak nie.
Dit gaan nie oor vas as vas nie. Dit gaan oor wat God daarmee bereik saam met die gebed.
As dit gebeur dat ‘n mens oorslaan, gaan net weer terug na die vas toe, sonder om jouself daaroor te verkwalik.
Is dit nie Ou Testamenties nie ?
Jesus het gevas, en ons lees ook in Handelinge oor vas. Dit is dus ook in die Nuwe Testamentiese tyd gedoen.
In die evangelies:
Jesus self het 40 dae lank gevas om Homself voor te berei vir Sy lewenstaak om versoening aan die kruis te bewerk.
(Matt 4:2 En nadat Hy veertig dae en veertig nagte gevas het, het Hy naderhand honger geword. )
Jesus se lering oor vas:
Matt 6:17 Maar jy, as jy vas, salf jou hoof en was jou gesig. (Moenie vas om iemand te beïndruk nie)
Matt 6:18 sodat jy nie die mense laat sien dat jy vas nie, maar jou Vader wat in die verborgene is;
en jou Vader wat in die verborgene sien, sal jou in die openbaar vergelde.
In Handelinge:
Hand 13:2 En terwyl hulle besig was om die Here te dien en te vas, het die Heilige Gees gesê: Sonder nou Bárnabas en Saulus vir My af vir die werk waarvoor Ek hulle geroep het.
Hand 14:23 En hulle het in elke gemeente vir hulle ouderlinge gekies, en hulle, ná gebed en vas, opgedra aan die Here in wie hulle geglo het.
Hand 27:33 En teen die tyd dat dit dag sou word, het Paulus almal aangemoedig om voedsel te gebruik en gesê: Dit is vandag die veertiende dag dat julle in afwagting bly vas sonder om iets te gebruik.
In ‘n brief van Paulus:
1Kor 7:5 Onttrek julle nie aan mekaar nie, behalwe met wedersydse ooreenstemming vir ‘n tyd lank om julle aan vas en gebed te kan wy; en kom weer bymekaar, sodat die Satan julle nie in versoeking bring deur julle gebrek aan selfbeheersing nie.
Gebed en vas gaan oor konkrete sake en om God se wil te soek:
Ester 8:21-23
[21] Toe het ek daar ‘n vastyd uitgeroep aan die rivier Ahawa, om ons te verootmoedig voor die aangesig van onse God ten einde van Hom ‘n voorspoedige reis te vra vir ons en ons families en al ons goed.
[22] Want ek was skaam om van die koning ‘n leër en perderuiters te vra om ons te help teen vyande op die pad, omdat ons met die koning gespreek en gesê het: Die hand van onse God is ten goede oor almal wat Hom soek, maar sy krag en sy toorn oor almal wat Hom verlaat.
[23] So het ons dan gevas en onse God dit gevra, en Hy het ons verhoor.
Voorsitter: Hester van den Berg 042 293 3077 / 083 356 4565
Ondervoorsitter: Vakant
Leraar: Ds Komatie van Niekerk 042 007 0380 / 082 455 0359
