Korona virus en NG Gemeente Jeffreysbaai (Amptelike kommunikasie 18 Maart 2020)

 Liewe vriende, die feit is dat die virus reeds besig is om in Suid-Afrika te versprei (teen die tyd wat hierdie brief geskryf is, was daar reeds meer as 60 gevalle van die Korona virus (CoVid-19) in Suid-Afrika aangemeld) en het reeds ’n baie groot impak op die wêreld ekonomie. Daar is twee moontlike reaksies waarteen ons moet waak – ’n oordrewe paniek wat maak dat ons emosionele besluite neem en in vrees begin lewe. As gelowiges is ons geloof en hoop mos in God Drie-enig geanker! Die ander reaksie is een van ontkenning wat ’n onverantwoordelike reaksie is.

Martin Luther se woorde tydens ’n vorige pandemie (“The Black Death”), wat byna 60% van Europa se populasie uitgewis het, kan ons  dalk help om die balans te vind:

“I shall ask God mercifully to protect us. Then I shall fumigate, help purify the air, administer medicine and take it. I shall avoid places and persons where my presence is not needed in order not to become contaminated and thus perchance inflict and pollute others and so cause their death as a result of my negligence. If God should wish to take me, he will surely find me and I have done what he has expected of me and so I am not responsible for either my own death or the death of others. If my neighbor needs me however I shall not avoid place or person but will go freely as stated above. See this is such a God-fearing faith because it is neither brash nor foolhardy and does not tempt God.”

Sondagaand 15 Maart het president Cyril Ramaphosa ’n Nasionale Ramptoestand aangekondig. Sekere maatreëls is ingestel. Alle skole sluit Woensdag 18 Maart en sal eers weer na Paasnaweek open. Alle byeenkomste waar 100 of meer mense teenwoordig is, word verbied. Die rede is om minder mense te hê wat op dieselfde tyd geïnfekteer word (die volgende artikel demonstreer dit baie goed):

https://www.washingtonpost.com/graphics/2020/world/corona-simulator/

Hierdie maatreël raak o.a. ons eredienste, groot begrafnisse, groot kursusse, ens.

Ons glo dat hierdie uitdaging ’n geleentheid is om dieper te groei in ons verhouding met God, mekaar en ander. Ons sal so goed as moontlik met die hele gemeente kommunikeer rondom die effektiewe voortsit van die bediening en ondersteuning aan lidmate.

Die volgende reëlings is nou van toepassing: (Ons is besig om te dink oor verdere stappe wat geneem sal word indien die situasie in ons omgewing verander)

OGGEND-EREDIENSTE:

As gevolg van die situasie waarin ons is, glo ons dat ons verantwoordelik moet optree en dat eredienste dus nie sal kan voortgaan op ’n Sondag nie. Ons glo ook dat hierdie vir ons ’n geleentheid bied om op ’n nuwe manier te dink en na mekaar geestelik, emosioneel en ook fisies om te sien. Daarom gaan ons op ’n nuwe manier kerk hou vanaf Sondag 22 Maart 2020:

  • Die gemeente kom op Sondae 09:00 (of soos die kleingroep afspreek) in kleingroepe bymekaar. Die doel van die groep is om mekaar te ondersteun en te begelei in hierdie tyd.
  • Materiaal sal vir alle groepe beskikbaar wees wat in die vorm van ’n gespreksdokument uitgegee gaan word. Die leier van die groep (of selfs enige persoon in die groep) sal die dokument kan gebruik om ’n geestelike gesprek te lei.
  • Die doel is dat die kleingroep goeie gesprek sal hê en ook die geleentheid sal gebruik om mekaar te ondersteun in die tyd.
  • Ons vra dat kleingroepe sovêr moontlik by huise (neem higiëniese riglyne asb. in ag) bymekaar sal kom. Indien dit nie moontlik is nie vra ons dat die groepleier ’n spasie sal bespreek by die kantoor om Sondae 09:00 bymekaar te kom. Ons spasie is natuurlik baie beperk. Ons het slegs 21 spasies wat ons kan akkommodeer. Spasies moet dus voor Donderdag 12:00 by die kantoor bespreek word.
  • Hierdie is ’n tydelike reëling en ook geleentheid waar ons op nuwe maniere kan ontdek hoe ons ons roeping in die wêreld kan uitleef.
  • Tydens hierdie geleenthede vra ons dat groepe sal saamwerk om die spasies veilig en higiënies te hou. Sorg dus dat daar altyd plek sal wees vir handewas, moenie mekaar met die hand groet of drukkies gee nie. Indien jy siekerig voel vra ons asb. om nie die geleentheid by te woon nie. (As groep is die uitdaging om kreatief te dink oor hoe ons die wat nie daar kan wees nie, kan versorg en bystaan.)

JONK:

Vir die vakansie is daar geen geleenthede wat plaasvind nie. Hou #imagine se sosiale kommunikasie dop vir inligting oor wat ons daar gaan doen. Ons sal weer kommunikeer wanneer kleingroepe sal begin en hoe ons kerk gaan wees in die toekoms.

BEKKIES EN TJOKKERS:

Tydens die skoolvakansie is daar geen Bekkie of Tjokker geleenthede nie.

KURSUSSE en BEDIENINGS GELEENTHEDE:

Kommunikasie sal volg.

DANKFEES:

 Kommunikasie sal volg.

PAASFEES:

Ons gesamentlike Paassangdiens wat sou plaasvind op Sondag 22 Maart 2020 is afgestel.

Verdere kommunikasie van Paasfees sal volg.

DANKOFFERS:

Tydens hierdie tyd van isolasie wil ons jou vriendelik versoek om steeds jou dankoffer en kollekte getrou te gee.

Jy kan op die volgende manier bydra:

  • EFT (NG Gemeente Jeffreysbaai, Absa, Tjek, 5170145625)
  • Kantoor inbetaling.
  • Dankoffer koeverte sal versprei word na kleingroepe. (Leiers is welkom om dit te kom afhaal by die kantoor)
  • Ons is besig om te kyk na verdere opsies en sal weer kommunikeer daaroor.

Jou getroue bydra help die gemeente om ’n verskil te maak!

PRAKTIESE RIGLYNE OM INFEKSIE TE VOORKOM

As geloofsgemeenskap het ons ‘n spesiale roeping om ons mede-gemeentelede en ander te versorg en die gemeenskap te ondersteun in hierdie tyd. As ons voorbereid is, is ons in ‘n beter posisie om ander te help. Kom ons maak van die probleem ‘n geleentheid om hoop te bring en werklik ‘n verskil te maak!

Goeie higiëne help baie om die verspreiding van die Korona virus te beperk, maar ook om verkoues en griep, te voorkom!

  • Was gereeld jou hande met seep en water vir ten minste 20 sekondes.
  • Nies of hoes in die hoek van jou elmboog of sneesdoekie, nie in jou hand nie. Was onmiddellik jou hande nadat jy gehoes, genies of neus geblaas het.
  • Moenie aan jou gesig, veral jou mond, neus en oë, raak met ongewaste hande nie.
  • Ontsmet gereeld oppervlaktes wat gereeld aangeraak word, insluitend selfone, sleutelborde, tafelblad, hysbakknoppies en deurknoppe.
  • Gebruik ‘n handontsmetingsmiddel.
  • Vermy noue kontak met iemand wat siek is. Vermy handdruk en drukkies heeltemal.

SIMPTOME

Die Korona virus (CoVid-19) is ‘n respiratoriese siekte wat griep-agtige simptome veroorsaak, insluitend koors, braking en asemhalingsprobleme.

  • As jy een van hierdie simptome het, bly asb. tuis.
  • Kry mediese hulp.
  • Bel vooraf, voordat jy na ‘n dokter of ‘n noodgevalle eenheid gaan. Vertel hulle van enige onlangse reise en jou simptome.
  • Vra om deel te neem aan vergaderings via ‘n video- of telefoniese konferensies terwyl jy herstel.
  • Laat weet asb. as ons as gemeente jou kan bystaan.

Kom ons bid en werk met liefde saam om die koninkryk van God te laat kom te midde van die uitdaging.

Nuttige skakels:

Baie dankie

NG Gemeente Jeffreysbaai Predikante span